ਕਸਬਾ ਸਿੱਧਵਾਂ ਬੇਟ ਦੇ ਇਕ ਠੇਕੇ ਦੀ ਹੋਈ ਭੰਨ-ਤੋੜ ਦਾ ਮਾਮਲਾ ਥਾਣਾ ਸਿੱਧਵਾਂ ਬੇਟ ਵਿਖੇ ਪੁੱਜਾ
ਅਜੀਤ ਡੈਸਕ
28-03-2026
ਸਿੱਧਵਾਂ ਬੇਟ, 27 ਮਾਰਚ (ਜਸਵੰਤ ਸਿੰਘ ਸਲੇਮਪੁਰੀ)-ਲੰਘੀ ਰਾਤ ਸਥਾਨਕ ਕਸਬੇ ਵਿਚ ਹੰਬੜਾਂ-ਲੁਧਿਆਣਾ ਸੜਕ 'ਤੇ ਅਤੇ ਕਿਸ਼ਨਪੁਰਾ ਚੌਕ ਨਜ਼ਦੀਕ ਸਥਿਤ ਇਕ ਸ਼ਰਾਬ ਦੇ ਠੇਕੇ 'ਤੇ ਪੁੱਜੇ ਕੁਝ ਲੋਕਾਂ ਵਲੋਂ ਠੇਕੇ ਦੀ ਭੰਨਤੋੜ ਕਰਨ ਦਾ ਮਾਮਲਾ ਥਾਣਾ ਸਿੱਧਵਾਂ ਬੇਟ ਵਿਖੇ ਪੁੱਜ ਗਿਆ ਹੈ | ਉਕਤ ਠੇਕੇ ਦੇ ਇੰਚਾਰਜ ਪਿੱਪਲ ਸਿੰਘ ਫਿਰੋਜ਼ਪੁਰ ਹਾਲ ਵਾਸੀ ਸਿੱਧਵਾਂ ਬੇਟ ਨੇ ਥਾਣਾ ਮੁਖੀ ਨੂੰ ਲਿਖੇ ਪੱਤਰ ਵਿਚ ਆਖਿਆ ਕਿ ਲੰਘੀ ਰਾਤ ਕੁਝ ਹੁੱਲੜਬਾਜ਼ ਠੇਕੇ ਦੇ ਸਾਹਮਣੇ ਮੋਟਰਸਾਈਕਲਾਂ 'ਤੇ ਪੁੱਜੇ | ਮੈਂ ਉਸ ਸਮੇਂ ਬੇਟ ਇਲਾਕੇ ਵਿਚ ਗਿਆ ਹੋਇਆ ਸੀ | ਸਾਡੇ ਕਰਿੰਦੇ ਅਮਿਤ ਨੇ ਮੈਨੂੰ ਫ਼ੋਨ ਕੀਤਾ ਕਿ ਆਏ ਹੋਏ ਲੋਕਾਂ ਵਿਚੋਂ ਮੈਂ ਕਿ੍ਸਨ ਨਾਂਅ ਦੇ ਵਿਅਕਤੀ ਨੂੰ ਜਾਣਦਾ ਸੀ | ਉਨ੍ਹਾਂ ਨੇ ਮੇਰੇ ਕੋਲੋਂ ਮੋਬਾਇਲ ਚਾਰਜ ਦੀ ਮੰਗ ਕੀਤੀ ਪਰ ਜਦੋਂ ਮੈਂ ਮੋਬਾਇਲ ਚਾਰਜ ਨਾ ਹੋਣ ਬਾਰੇ ਉਨ੍ਹਾਂ ਨੂੰ ਦੱਸਿਆ ਤਾਂ ਉਹ ਇਕਦਮ ਤੈਸ਼ ਵਿਚ ਆ ਗਏ ਅਤੇ ਪੱਥਰਾਂ ਨਾਲ ਠੇਕੇ ਦੀ ਭੰਨਤੋੜ ਕਰਨੀ ਸ਼ੁਰੂ ਕਰ ਦਿੱਤੀ | ਪਿੱਪਲ ਸਿੰਘ ਨੇ ਇਹ ਵੀ ਦੱਸਿਆ ਕਿ ਉਹ ਇਸ ਘਟਨਾ ਤੋਂ ਬਾਅਦ ਵੀ ਕਈ ਵਾਰ ਠੇਕੇ ਦੇ ਸਾਹਮਣੇ ਤੋਂ ਲੰਘੇ | ਇਸ ਉਪਰੰਤ ਅਸੀਂ ਇਕ ਸ਼ਖ਼ਸ ਨੂੰ ਕਾਬੂ ਕਰਕੇ ਪੁਲਿਸ ਦੇ ਹਵਾਲੇ ਵੀ ਕਰ ਦਿੱਤਾ ਹੈ | ਠੇਕਾ ਇੰਚਾਰਜ ਨੇ ਮੰਗ ਕੀਤੀ ਕਿ ਦੋਸ਼ੀਆਂ ਖ਼ਿਲਾਫ਼ ਬਣਦੀ ਸਖ਼ਤ ਕਾਰਵਾਈ ਕੀਤੀ ਜਾਵੇ | ਦੂਜੇ ਪਾਸੇ ਹੁੱਲੜਬਾਜਾਂ ਵਲੋਂ ਠੇਕੇ ਦੀ ਭੰਨਤੋੜ ਕਰਦਿਆਂ ਦੀ ਵੀਡੀਓ ਵੀ ਬੜੀ ਤੇਜ਼ੀ ਨਾਲ ਸ਼ੋਸਲ ਮੀਡੀਏ 'ਤੇ ਫੈਲ ਰਹੀ ਹੈ |
