ਖੜ੍ਹੀ ਗੱਡੀ ਨੂੰ ਤੇਜ਼ ਰਫ਼ਤਾਰ ਮੋਟਰਸਾਈਕਲ ਨੇ ਮਾਰੀ ਟੱਕਰ, ਨੌਜਵਾਨ ਜ਼ਖ਼ਮੀ

ਮਕਸੂਦਾਂ, 6 ਦਸੰਬਰ (ਸੌਰਵ ਮਹਿਤਾ)- ਮਕਸੂਦਾਂ ਸਬਜ਼ੀ ਮੰਡੀ ਦੇ ਨੇੜੇ ਖੜ੍ਹੀ ਗੱਡੀ ਨੂੰ ਪਿੱਛੋਂ ਦੀ ਆ ਰਹੇ ਤੇਜ਼ ਰਫਤਾਰ ਮੋਟਰਸਾਈਕਲ ਨੇ ਟੱਕਰ ਮਾਰ ਦਿੱਤੀ। ਟੱਕਰ ਇੰਨੀ ਜ਼ੋਰਦਾਰ ਸੀ ਕਿ ਮੋਟਰਸਾਈਕਲ ਸਵਾਰ ਜ਼ਖ਼ਮੀ ਹੋ ਗਿਆ ਤੇ ਕਾਰ ਅਤੇ ਮੋਟਰਸਾਈਕਲ ਦੋਵੇਂ ਨੁਕਸਾਨੇ ਗਏ। ਜਾਣਕਾਰੀ ਮੁਤਾਬਕ, ਭਾਜਪਾ ਨੇਤਾ ਕੇ.ਡੀ. ਭੰਡਾਰੀ ਦੀ ਪਤਨੀ ਤੇ ਧੀ ਖਰੀਦਦਾਰੀ ਲਈ ਇਲਾਕੇ 'ਚ ਆਏ ਸਨ। ਪਤਨੀ ਸਮਾਨ ਲੈਣ ਲਈ ਦੁਕਾਨ 'ਚ ਗਈ ਹੋਈ ਸੀ ਜਦ ਦਿ ਉਨ੍ਹਾਂ ਦੀ ਬੇਟੀ ਕਾਰ 'ਚ ਬੈਠੀ ਸੀ। ਇਸ ਦੌਰਾਨ ਮੋਟਰਸਾਈਕਲ ਸਵਾਰ ਨੇ ਬੇਕਾਬੂ ਹੋ ਕੇ ਗੱਡੀ ਨਾਲ ਟੱਕਰ ਮਾਰੀ। ਲੋਕਾਂ ਨੇ ਤੁਰੰਤ ਹੀ ਜਖ਼ਮੀ ਨੌਜਵਾਨ ਸੰਭਾਲਿਆ ਤੇ ਨੇੜਲੇ ਹਸਪਤਾਲ ਪਹੁੰਚਾਇਆ। ਮੌਕੇ 'ਤੇ ਮੌਜੂਦ ਲੋਕਾਂ ਦਾ ਦਾਅਵਾ ਹੈ ਕਿ ਮੋਟਰਸਾਈਕਲ ਸਵਾਰ ਨਸ਼ੇ ਦੀ ਹਾਲਤ 'ਚ ਸੀ। ਫਿਲਹਾਲ ਥਾਣਾ ਡਿਵੀਜ਼ਨ ਨੰਬਰ 1 ਦੀ ਪੁਲਿਸ ਵਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।