ਕਾਲਾਂਵਾਲੀ/ਸਿਰਸਾ, 22 ਨਵੰਬਰ (ਭੁਪਿੰਦਰ ਪੰਨੀਵਾਲੀਆ)- ਮਾਰਕੀਟ ਕਮੇਟੀ ਕਾਲਾਂਵਾਲੀ ਦੇ ਚੇਅਰਮੈਨ ਅਤੇ ਮੈਂਬਰਾਂ ਦੀ ਪਲੇਠੀ ਮੀਟਿੰਗ ਕਮੇਟੀ ਦਫ਼ਤਰ ਵਿਖੇ ਚੇਅਰਮੈਨ ਸਤਪਾਲ ਸ਼ਰਮਾ ਪਿਪਲੀ ਦੀ ਪ੍ਰਧਾਨਗੀ ਹੇਠ ਹੋਈ | ਇਸ ਮੀਟਿੰਗ ਵਿੱਚ ਵਾਈਸ ਚੇਅਰਮੈਨ ਮੋਹਨ ਲਾਲ ਜਿੰਦਲ ਅਤੇ ਹੋਰ ਮੈਂਬਰਾਂ ਨੇ ਹਿੱਸਾ ਲਿਆ | ਇਸ ਮੀਟਿੰਗ ਵਿੱਚ ਸਭ ਤੋਂ ਪਹਿਲਾਂ ਮੁੱਖ ਮੰਤਰੀ ਅਤੇ ਭਾਜਪਾ ਹਾਈਕਮਾਂਡ ਦਾ ਕਮੇਟੀ ਬਣਾਉਣ ਲਈ ਧੰਨਵਾਦ ਕੀਤਾ ਗਿਆ | ਇਸ ਤੋਂ ਇਲਾਵਾ, ਮੀਂਹ ਅਤੇ ਗੜੇਮਾਰੀ ਨਾਲ ਹੋਏ ਕਿਸਾਨਾਂ ਦੀਆਂ ਫਸਲਾਂ ਦੇ ਨੁਕਸਾਨ ਲਈ ਮੁਆਵਜ਼ਾ ਅਤੇ ਬੀਮਾ ਰਾਸ਼ੀ ਜਲਦੀ ਜਾਰੀ ਕਰਨ ਦੀ ਮੰਗ ਕੀਤੀ ਗਈ | ਮੈਂਬਰ ਨਰੇਸ਼ ਮਹੇਸ਼ਵਰੀ ਨੇ ਜਲਾਲਆਣਾ ਤੋਂ ਕਾਲਾਂਵਾਲੀ ਸੜਕ ਨੂੰ ਚੌੜਾ ਕਰਨ ਅਤੇ ਨਵੀਨੀਕਰਨ ਕਰਨ ਅਤੇ ਅਨਾਜ ਮੰਡੀ ਵਿੱਚ 150 ਟਨ ਭਾਰ ਤੋਲਣ ਵਾਲੀ ਮਸ਼ੀਨ ਲਗਾਉਣ ਦੀ ਮੰਗ ਕੀਤੀ | ਮਤੇ ਪਾਸ ਕਰਕੇ ਮਾਰਕੀਟਿੰਗ ਬੋਰਡ ਨੂੰ ਭੇਜੇ ਗਏ | ਇਸ ਤੋਂ ਇਲਾਵਾ ਪਾਨਾ ਖਰੀਦ ਕੇਂਦਰ ਵਿੱਚ ਇੱਕ ਕਮਰਾ, ਸ਼ੈੱਡ, ਟਾਇਲਟ, ਚਾਰਦੀਵਾਰੀ ਅਤੇ ਗੇਟ ਬਣਾਉਣ ਲਈ ਵੀ ਪ੍ਰਸਤਾਵ ਰੱਖੇ ਗਏ | ਇਸ ਤਰ੍ਹਾਂ ਹੀ ਕੱਚਾ ਆੜ੍ਹਤੀਆ ਐਸੋਸੀਏਸ਼ਨ ਦੇ ਮੈਂਬਰ ਮਹੇਸ਼ ਕੁਮਾਰ ਵੱਲੋਂ ਹੋਰ ਮੈਂਬਰਾਂ ਨਾਲ ਮੰਗਾਂ ਦਾ ਇੱਕ ਮੰਗ ਪੱਤਰ ਚੇਅਰਮੈਨ ਨੂੰ ਸੌਂਪਿਆ ਗਿਆ | ਇਨ੍ਹਾਂ ਵਿੱਚ ਪਿੰਡ ਦੇ ਰਸਤੇ, ਸੜਕਾਂ ਅਤੇ ਖਰੀਦ ਕੇਂਦਰਾਂ ਲਈ ਪ੍ਰਸਤਾਵ ਸ਼ਾਮਲ ਸਨ | ਮੈਂਬਰਾਂ ਸੂਰਜ ਭਾਨ ਖਣਗਵਾਲ ਅਤੇ ਸੰਨੀ ਨਿਨਾਨੀਆ ਨੇ ਅਨਾਜ ਮੰਡੀ ਵਿੱਚ ਇੱਕ ਹੋਰ ਪਖਾਨਾ ਬਣਾਉਣ ਅਤੇ ਵਾਟਰ ਕੂਲਰ ਲਗਾਉਣ ਦੀ ਮੰਗ ਕੀਤੀ | ਇਸ ਮੌਕੇ ਮੈਂਬਰ ਨਰੇਸ਼ ਮਹੇਸ਼ਵਰੀ, ਮਹੇਸ਼ ਆਜ਼ਾਦ, ਰਤਨ ਲਾਲ, ਸੂਰਜ ਭਾਨ ਖਣਗਵਾਲ, ਸੰਨੀ ਨਿਨਿਆਨਾ, ਹਰਜਸ ਸਿੰਘ ਪੱਕਾ, ਪ੍ਰਗਟ ਸਿੰਘ, ਕਰਮਤੇਜ ਸਿੰਘ ਬੜਾਗੁੜਾ, ਰਾਏ ਸਿੰਘ ਛਤਰੀਆਂ, ਗੁਰਦਾਸ ਸਿੰਘ ਧਰਮਪੁਰਾ, ਸੁਖਪਾਲ ਸਿੰਘ ਸੂਰਤੀਆ, ਚਰਨਪਾਲ ਸਿੰਘ ਦੌਲਤਪੁਰਖੇੜਾ ਆਦਿ ਹਾਜ਼ਰ ਸਨ |
