ਫੋਟੋ ਫਰੇਮ ਗੋਦਾਮ ਵਿਚ ਭਿਆਨਕ ਅੱਗ ਹਾਦਸਾ, 20 ਲੱਖ ਰੁਪਏ ਦਾ ਨੁਕਸਾਨ
ਅਜੀਤ ਡੈਸਕ
07-11-2025
ਇਸ ਘਟਨਾ ਨੇ ਸ਼ਹਿਰ ਦੇ ਤੰਗ ਬਾਜਾਰਾਂ ਵਿਚ ਹੋ ਰਹੇ ਨਾਜਾਇਜ ਕਬਜ਼ਿਆਂ ਦੀ ਹਕੀਕਤ ਬੇਨਕਾਬ ਕਰ ਦਿੱਤੀ ਹੈ | ਸ੍ਰੀ ਰਾਮ ਮਾਰਕੀਟ ਗਲੀ ਸਿਰਫ 14 ਫੁੱਟ ਚੌੜੀ ਹੈ, ਪਰ ਕਬਜ਼ਿਆਂ ਕਾਰਨ ਰਸਤਾ ਕੁਝ ਫੁੱਟ ਹੀ ਰਹਿ ਗਿਆ ਹੈ | ਗਲੀ ਵਿਚ ਦੁਕਾਨਦਾਰਾਂ ਮੂਹਰੇ ਥੜੇ, ਸਾਮਾਨ ਅਤੇ ਸੀਵਰੇਜ ਟੈਂਕਾਂ ਕਰਕੇ ਪੈਦਲ ਲੰਘਣਾ ਵੀ ਔਖਾ ਹੈ | ਫਾਇਰ ਬਿ੍ਗੇਡ ਗੱਡੀ ਨੂੰ ਘਟਨਾ ਵਾਲੀ ਜਗ੍ਹਾ ਤੱਕ ਪੁੱਜਣ ਵਿਚ ਕਾਫ਼ੀ ਮੁਸ਼ਕਲ ਆਈ | ਗਲੀ ਵਿਚ ਉੱਪਰੋਂ ਲਟਕਦੀਆਂ ਬਿਜਲੀ, ਵਾਈ-ਫਾਈ ਅਤੇ ਕੇਬਲ ਤਾਰਾਂ ਵੀ ਰੁਕਾਵਟ ਬਣੀਆਂ | ਜਾਣਕਾਰੀ ਮੁਤਾਬਕ ਗੋਦਾਮ ਦਾ ਮੁੱਖ ਰਸਤਾ ਸਿਰਫ ਤਿੰਨ ਫੁੱਟ ਚੌੜਾ ਅਤੇ 25 ਫੁੱਟ ਲੰਬਾ ਹੋਣ ਕਾਰਨ ਰਾਹਤ ਕਾਰਜਾਂ ਵਿਚ ਵੱਡੇ ਅੜਿੱਕੇ ਪਏ | ਥਾਣਾ ਸਿਟੀ ਮੁਖੀ ਸ਼ਲਿੰਦਰ ਕੁਮਾਰ ਅਤੇ ਪਟਵਾਰੀ ਅਮੀ ਲਾਲ ਵੀ ਮੌਕੇ 'ਤੇ ਪਹੁੰਚੇ | ਖੁਸ਼ਕਿਸਮਤੀ ਨਾਲ ਅੱਗ ਗੋਦਾਮ ਤੱਕ ਹੀ ਸੀਮਿਤ ਰਹੀ, ਨਹੀਂ ਤਾਂ ਨਾਲ ਲੱਗਦੀਆਂ ਦੁਕਾਨਾਂ ਅਤੇ ਘਰਾਂ ਨੂੰ ਵੀ ਵੱਡਾ ਨੁਕਸਾਨ ਹੋ ਸਕਦਾ ਸੀ |
ਸ਼ੰਭੂ ਫੋਟੋ ਫਰੇਮ ਦੇ ਮਾਲਕ ਅਮਿਤ ਕੁਮਾਰ ਉਰਫ ਮੋਨੂੰ ਮੋਂਗਾ ਨੇ ਦੱਸਿਆ ਕਿ ਗੋਦਾਮ ਨੇੜੇ ਕੁਝ ਨੌਜਵਾਨਾਂ ਵਲੋਂ ਪਟਾਖੇ ਚਲਾਏ ਜਾਣ ਕਾਰਨ ਅੱਗ ਲੱਗੀ ਅਤੇ ਉਸ ਵੱਲੋਂ ਬੜੀ ਮਿਹਨਤ ਨਾਲ ਖੜੀ ਕੀਤੇ ਰੁਜ਼ਗਾਰ ਦੀ ਬੁਨਿਆਦ ਢਹਿ-ਢੇਰੀ ਹੋ ਗਈ |
ਵਾਰਡ ਦੇ ਸਾਬਕਾ ਕੌਂਸਲਰ ਵਿਨੋਦ ਬਾਂਸਲ ਨੇ ਕਿਹਾ ਕਿ ਇਸ ਅੱਗ ਘਟਨਾ ਨੇ ਨਗਰ ਪ੍ਰੀਸ਼ਦ ਦੀ ਨਿਕੰਮੀ ਕਾਰਗੁਜਾਰੀ ਨੂੰ ਉਜਾਗਰ ਕੀਤਾ ਹੈ | ਬਾਜ਼ਾਰਾਂ ਵਿਚ ਕਬਜ਼ਿਆਂ ਖਿਲਾਫ਼ ਕਾਰਵਾਈ ਸਿਰਫ਼ ਕਾਗਜਾਂ ਤੱਕ ਸੀਮਿਤ ਹੈ | ਤੰਗ ਖੇਤਰਾਂ ਦੀ ਵਸੋਂ ਸਿੱਧੇ ਖ਼ਤਰੇ ਦੇ ਪਰਛਾਵੇਂ ਹੇਠਾਂ ਜਿਉਂ ਰਹੀ ਹੈ ਅਤੇ ਨਾਜਾਇਜ਼ ਕਬਜ਼ ਸਥਿਤੀ ਨੂੰ ਦਿਨੋਂ-ਦਿਨ ਵਿਗਾੜ ਰਹੇ ਹਨ | ਜਦਕਿ ਨਗਰ ਪ੍ਰੀਸ਼ਦ ਵਲੋਂ ਕੋਈ ਕਦਮ ਨਹੀਂ ਪੁੱਟੇ ਜਾ ਰਹੇ ਹਨ |
