ਸਮਾਧ ਭਾਈ, 17 ਜੁਲਾਈ (ਜਗਰੂਪ ਸਿੰਘ ਸਰੋਆ)-ਕਈ ਦਿਨਾਂ ਦੇ ਤੋਂ ਰੁਕ ਰੁਕ ਕੇ ਪੈ ਰਹੇ ਮੀਂਹ ਅਤੇ ਬੀਤੀ ਰਾਤ ਪਏ ਭਾਰੀ ਮੀਂਹ ਕਾਰਨ ਪਿੰਡ ਕੋਟਲਾ ਰਾਏਕਾ ਦੇ ਕਿਸਾਨ ਦਵਿੰਦਰ ਸਿੰਘ ਪੁੱਤਰ ਅਵਤਾਰ ਸਿੰਘ ਦਾ ਪਸ਼ੂਆਂ ਵਾਲਾ ਸ਼ੈੱਡ ਡਿੱਗ ਜਾਣ ਕਾਰਨ ਭਾਰੀ ਜਾਨੀ ਤੇ ਮਾਲੀ ਨੁਕਸਾਨ ਹੋ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ | ਸ਼ੈੱਡ ਦੇ ਮਾਲਕ ਕਿਸਾਨ ਦਵਿੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੇ ਡੇਅਰੀ ਦਾ ਕਾਰੋਬਾਰ ਚਲਾਉਣ ਲਈ ਪਿਛਲੇ ਸਾਲ ਹੀ ਇਹ ਸ਼ੈੱਡ ਬਣਾਇਆ ਸੀ ਅਤੇ ਉਸ ਕੋਲ 18 ਕੀਮਤੀ ਪਸ਼ੂ ਰੱਖੇ ਹੋਏ ਸਨ ਕਿ ਰਾਤੀਂ ਤੇਜ਼ ਬਾਰਿਸ਼ ਹੋਣ ਕਰਕੇ, ਪਸ਼ੂਆਂ ਨੂੰ ਗਰਮੀ ਤੋਂ ਬਚਾਉਣ ਲਈ ਬਣਾਇਆ ਬਾਂਸਾਂ ਦਾ ਸ਼ੈੱਡ ਅਚਾਨਕ ਢਹਿ ਢੇਰੀ ਹੋ ਗਿਆ, ਜਿਸ ਹੇਠ ਆਉਣ ਨਾਲ ਤਿੰਨ ਕੀਮਤੀ ਮੱਝਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ ਤੇ ਕਈ ਜ਼ਖ਼ਮੀ ਹੋ ਗਈਆਂ ਜਿਨ੍ਹਾਂ ਵਿਚੋਂ ਇਕ ਮੱਝ ਤੇ ਤਿੰਨ ਝੋਟੀਆਂ ਜ਼ਖ਼ਮੀ ਹਨ | ਹਾਦਸੇ ਦਾ ਪਤਾ ਲੱਗਣ 'ਤੇ ਉਨ੍ਹਾਂ ਨੇ ਪਿੰਡ 'ਚ ਸੁਨੇਹੇ ਲਾਏ ਤਾਂ ਲੋਕਾਂ ਨੇ ਜੇ. ਸੀ. ਬੀ. ਤੇ ਕਰੇਨਾਂ ਦੀ ਮਦਦ ਨਾਲ ਪਸ਼ੂਆਂ ਨੂੰ ਮਲਬੇ ਹੇਠੋਂ ਕੱਢਿਆ | ਦਵਿੰਦਰ ਸਿੰਘ ਨੇ ਭਰੇ ਮਨ ਆਖਿਆ ਕਿ ਉਨ੍ਹਾਂ ਆਪਣੇ ਰੁਜ਼ਗਾਰ ਨੂੰ ਵਧਾਉਣ ਲਈ ਲੱਖਾਂ ਰੁਪਏ ਲਾ ਕੇ ਇਹ ਉਪਰਾਲਾ ਕੀਤਾ ਸੀ ਪਰ ਕੁਦਰਤ ਦੀ ਮਾਰ ਨਾਲ ਉਸ ਦਾ 10 ਤੋਂ 12 ਲੱਖ ਦਾ ਨੁਕਸਾਨ ਹੋ ਗਿਆ ਹੈ | ਇਸ ਮੌਕੇ ਮਾਰਕੀਟ ਕਮੇਟੀ ਬਾਘਾ ਪੁਰਾਣਾ ਦੇ ਚੇਅਰਮੈਨ ਮਨਦੀਪ ਸਿੰਘ ਮਾਨ ਤੇ ਸਰਪੰਚ ਹਰਪ੍ਰੀਤ ਸਿੰਘ ਗਿੱਲ ਨੇ ਪੀੜਤ ਪਰਿਵਾਰ ਨੂੰ ਭਰੋਸਾ ਦਿਵਾਇਆ ਕਿ ਉਹ ਪੰਜਾਬ ਸਰਕਾਰ ਤੇ ਪ੍ਰਸ਼ਾਸਨ ਨੂੰ ਬਣਦੀ ਰਿਪੋਰਟ ਸੌਂਪ ਕੇ ਮਾਲੀ ਮਦਦ ਕਰਾਉਣਗੇ |
