ਫ਼ਤਹਿਗੜ੍ਹ ਸਾਹਿਬ, 20 ਨਵੰਬਰ (ਬਲਜਿੰਦਰ ਸਿੰਘ)-ਵਿਸ਼ਵ ਬਵਾਸੀਰ ਦਿਵਸ ਮੌਕੇ 'ਤੇ ਰਾਣਾ ਹਸਪਤਾਲ ਸਰਹਿੰਦ ਵਿਚ ਡਾ. ਹੇਂਤਿੰਦਰ ਸੂਰੀ (ਕੰਸਲਟੈਂਟ ਪ੍ਰੋਕਟੋਲੋਜਿਸਟ ਤੇ ਐਮ. ਡੀ., ਰਾਣਾ ਹਸਪਤਾਲ) ਵਲੋਂ ਇਕ ਖ਼ਾਸ ਜਾਗਰੂਕਤਾ ਸੈਮੀਨਾਰ ਕਰਵਾਇਆ | ਡਾ. ਸੂਰੀ ਨੇ ਦੱਸਿਆ ਕਿ ਬਵਾਸੀਰ ਤੇ ਰੈਕਟਲ ਕੈਂਸਰ ਦੇ ਲੱਛਣ ਅਕਸਰ ਇਕੋ ਜਿਹੇ ਹੁੰਦੇ ਹਨ ਅਤੇ ਸਮੇਂ 'ਤੇ ਜਾਂਚ ਜ਼ਿੰਦਗੀ ਬਚਾ ਸਕਦੀ ਹੈ | ਉਨ੍ਹਾਂ ਕਿਹਾ ਕਿ ਬਹੁਤ ਸਾਰੇ ਲੋਕ ਸ਼ੁਰੂਆਤੀ ਲੱਛਣਾਂ ਦੀ ਅਣਡਿੱਠੀ ਕਰਦੇ ਹਨ, ਜਿਸ ਨਾਲ ਬਿਮਾਰੀ ਆਖ਼ਰੀ ਪੜਾਅ ਵਿਚ ਪਹੁੰਚ ਜਾਂਦੀ ਹੈ | ਉਨ੍ਹਾਂ ਸਲਾਹ ਦਿੱਤੀ ਕਿ ਜੇ ਮਲਦਾਰ ਤੋਂ ਖ਼ੂਨ, ਦਰਦ, ਗੱਠ ਜਾਂ ਪਖਾਨੇ ਦੀਆਂ ਆਦਤਾਂ ਵਿਚ ਬਦਲਾਅ ਵੇਖੇ ਜਾਣ, ਤਾਂ ਤੁਰੰਤ ਡਾਕਟਰ ਨਾਲ ਸੰਪਰਕ ਕੀਤਾ ਜਾਵੇ | ਉਨ੍ਹਾਂ ਇਹ ਵੀ ਜ਼ਿਕਰ ਕੀਤਾ ਕਿ ਰੈਕਟਲ ਕੈਂਸਰ ਦੁਨੀਆ ਦਾ ਤੀਜਾ ਸਭ ਤੋਂ ਆਮ ਕੈਂਸਰ ਹੈ | ਆਈ. ਸੀ. ਐਮ. ਆਰ. ਦੇ ਅਨੁਸਾਰ ਭਾਰਤ ਵਿਚ 78 ਫ਼ੀਸਦੀ ਮਰੀਜ਼ਾਂ ਦੀ ਪਛਾਣ ਆਖ਼ਰੀ ਪੜਾਅ 'ਚ ਹੁੰਦੀ ਹੈ, ਕਿਉਂਕਿ ਲੱਛਣਾਂ ਨੂੰ ਗੰਭੀਰਤਾ ਨਾਲ ਨਹੀਂ ਲਿਆ ਜਾਂਦਾ | ਇਸ ਸੈਮੀਨਾਰ ਦਾ ਮੰਤਵ ਲੋਕਾਂ ਵਿਚ ਜਾਗਰੂਕਤਾ ਫੈਲਾਉਣਾ ਤੇ ਸਮੇਂ 'ਤੇ ਇਲਾਜ ਦੀ ਮਹੱਤਤਾ ਬਾਰੇ ਸੁਚੇਤ ਕਰਨਾ ਸੀ | ਰਾਣਾ ਹਸਪਤਾਲ ਲੋਕ ਸਿਹਤ ਜਾਗਰੂਕਤਾ ਲਈ ਹਮੇਸ਼ਾ ਵਚਨਬੱਧ ਹੈ ਤੇ ਅੱਗੇ ਵੀ ਅਜਿਹੇ ਜਾਗਰੂਕਤਾ ਪ੍ਰੋਗਰਾਮ ਕਰਦਾ ਰਹੇਗਾ |
