ਫ਼ਤਹਿਗੜ੍ਹ ਸਾਹਿਬ, 19 ਜੁਲਾਈ (ਰਵਿੰਦਰ ਮੌਦਗਿਲ)-ਬੇਖ਼ੌਫ ਨਾਮਾਲੂਮ ਚੋਰਾਂ ਵਲੋਂ ਪਿੰਡ ਆਲੀਆਂ-ਤਲਾਣੀਆਂ, ਬਹਾਦਰਗੜ੍ਹ ਵਿਖੇ ਸਥਿਤ ਹਜ਼ਰਤ ਨੌਂ ਗਜਾ ਪੀਰ ਬਾਬਾ ਦੀ ਦਰਗਾਹ 'ਚ ਲੱਗਾ ਗੱਲਾ ਤੋੜ ਕੇ ਲੋਕਾਂ ਵਲੋਂ ਚੜ੍ਹਾਏ ਪੈਸੇ ਚੋਰੀ ਕੀਤੇ ਜਾਣ ਦੀ ਸੂਚਨਾ ਹੈ | ਦਰਗਾਹ ਦੇ ਮੁੱਖ ਸੇਵਾਦਾਰ ਸੁਰਜੀਤ ਸਿੰਘ ਨੇ ਦੱਸਿਆ ਕਿ ਲੰਘੀ ਰਾਤ ਪੌਣੇ ਤਿੰਨ ਕੁ ਵਜੇ ਹੋਈ ਚੋਰੀ ਦੀ ਘਟਨਾ ਸੀ. ਸੀ. ਟੀ.ਵੀ. ਵਿਚ ਕੈਦ ਹੋਈ ਹੈ | ਫੁਟੇਜ ਦੇਖਣ 'ਤੇ ਪਤਾ ਲੱਗਾ ਕਿ ਇਕ ਬੰਦਾ ਆਇਆ ਤੇ ਸੱਬਲ ਨਾਲ ਗੱਲਾ ਤੋੜਿਆ ਤੇ ਉਸ ਵਿਚ ਪਏ ਪੈਸੇ ਕੱਢ ਕੇ ਲੈ ਗਿਆ | ਸੇਵਾਦਾਰ ਨੇ ਦੱਸਿਆ ਕਿ ਗੱਲੇ ਵਿਚ ਪਿਛਲੇ ਇਕ ਸਾਲ ਤੋਂ ਜਮ੍ਹਾ ਰਾਸ਼ੀ 15 ਹਜ਼ਾਰ ਰੁਪਏ ਦੇ ਕਰੀਬ ਹੋ ਸਕਦੀ ਹੈ | ਉਨ੍ਹਾਂ ਦੱਸਿਆ ਕਿ ਨਾਮਾਲੂਮ ਚੋਰ ਪਹਿਲਾਂ ਵੀ ਚਾਰ ਪੰਜ ਵਾਰ ਇੱਥੇ ਚੋਰੀ ਦੀ ਵਾਰਦਾਤ ਨੂੰ ਅੰਜਾਮ ਦੇ ਚੁੱਕੇ ਹਨ | ਸੇਵਾਦਾਰ ਨੇ ਪੁਲਿਸ ਨੂੰ ਚੋਰ ਨੂੰ ਜਲਦ ਕਾਬੂ ਕਰਕੇ ਬਣਦੀ ਕਾਨੂੰਨੀ ਕਾਰਵਾਈ ਕਰਨ ਦੀ ਅਪੀਲ ਕੀਤੀ ਹੈ |
