ਭੰਗਾਲਾ, 18 ਅਕਤੂਬਰ (ਬਲਵਿੰਦਰਜੀਤ ਸਿੰਘ ਸੈਣੀ)-ਜਲੰਧਰ-ਪਠਾਨਕੋਟ ਰਾਸ਼ਟਰੀ ਰਾਜ ਮਾਰਗ 'ਤੇ ਸਥਿਤ ਕਸਬਾ ਭੰਗਾਲਾ ਦੇ ਬੱਸ ਅੱਡੇ 'ਤੇ ਕੋਈ ਟ੍ਰੈਫਿਕ ਲਾਈਟਾਂ ਨਾ ਹੋਣ ਕਰਕੇ ਆਏ ਦਿਨ ਕੋਈ ਨਾ ਕੋਈ ਹਾਦਸਾ ਵਾਪਰ ਰਿਹਾ ਹੈ | ਇਸ ਮੌਕੇ ਇਲਾਕਾ ਨਿਵਾਸੀ ਮੁਹਤਬਰਾਂ ਨੇ ਦੱਸਿਆ ਕਿ ਹਾਲਾਤ ਇਸ ਤਰ੍ਹਾਂ ਦੇ ਹੋ ਗਏ ਹਨ ਕਿ ਜਦੋਂ ਲੋਕ ਬੱਸ ਅੱਡਾ ਭੰਗਾਲਾ ਤੋਂ ਇੱਧਰ-ਉੱਧਰ ਜਾਂਦੇ ਹਨ ਤਾਂ ਸੈਂਟਰ 'ਚ ਰੁਕਣ ਲਈ ਪੂਰਾ ਜਗ੍ਹਾਂ ਨਹੀਂ ਮਿਲਦੀ, ਜਿਸ ਕਰ ਕੇ ਉਹ ਜਲਦੀ 'ਚ ਸੜਕ ਪਾਰ ਕਰਦੇ ਹਨ ਤੇ ਉਹ ਕਿਸੇ ਨਾ ਕਿਸੇ ਗੱਡੀ ਮੋਟਰ ਦੀ ਲਪੇਟ 'ਚ ਆ ਜਾਂਦੇ ਹਨ ਜਿਸ ਨਾਲ ਉਨ੍ਹਾਂ ਨੂੰ ਗੰਭੀਰ ਸੱਟਾਂ ਚੋਟਾਂ ਲੱਗ ਜਾਂਦੀਆਂ ਹਨ | ਉਨ੍ਹਾਂ ਦੱਸਿਆ ਕਿ ਭੰਗਾਲਾ ਵਿਖੇ ਪੱਕਾ ਬੱਸ ਅੱਡਾ ਨਹੀਂ ਹੈ, ਜਿਸ ਨਾਲ ਬੱਸਾਂ ਵਾਲੇ ਠੀਕ ਥਾਂ 'ਤੇ ਬੱਸ ਨਹੀਂ ਰੋਕਦੇ ਤੇ ਕਈ ਵਾਰ ਗੰਭੀਰ ਹਾਦਸੇ ਹੋਏ ਹਨ, ਜਿਸ 'ਚ ਸਵਾਰੀਆਂ ਨੇ ਆਪਣੀਆਂ ਜਾਨਾਂ ਵੀ ਗਵਾਈਆਂ ਹਨ | ਇਲਾਕਾ ਵਾਸੀਆਂ ਨੇ ਪੰਜਾਬ ਸਰਕਾਰ ਤੋਂ ਪੁਰਜ਼ੋਰ ਮੰਗ ਕੀਤੀ ਕਿ ਭੰਗਾਲਾ ਬੱਸ ਅੱਡਾ ਵਿਖੇ ਇਕ ਤਾਂ ਟ੍ਰੈਫਿਕ ਲਾਈਟਾਂ ਲਗਾਈਆ ਜਾਵੇ ਅਤੇ ਦੂਜਾ ਪੱਕਾ ਬੱਸ ਅੱਡਾ ਬਣਾਇਆ ਜਾਵੇੇ |
