ਨਵੀਂ ਦਿੱਲੀ, 18 ਨਵੰਬਰ (ਜਗਤਾਰ ਸਿੰਘ)-ਰਾਜਧਾਨੀ ਦੇ ਭਾਰਤ ਮੰਡਪਮ ਵਿਖੇ ਸ਼ੁਰੂ ਹੋਇਆ 44ਵਾਂ ਅੰਤਰਰਾਸ਼ਟਰੀ ਵਪਾਰ ਮੇਲਾ 19 ਨਵੰਬਰ ਤੋਂ ਆਮ ਲੋਕਾਂ ਲਈ ਵੀ ਖੁੱਲ੍ਹ ਜਾਏਗਾ | ਦੱਸਣਯੋਗ ਹੈ ਕਿ 14 ਨਵੰਬਰ ਤੋਂ ਸ਼ੁਰੂ ਹੋਏ ਇਸ ਵਪਾਰ ਦੇ ਪਹਿਲੇ 5 ਦਿਨ ਬਿਜ਼ਨਸ ਡੇਅ ਹੁੰਦੇ ਹਨ,ਜਿਸ ਲਈ ਇਨ੍ਹਾਂ ਪੰਜ ਦਿਨਾਂ ਦੀ ਟਿਕਟ ਵੀ ਕਾਫ਼ੀ ਮਹਿੰਗੀ ਹੁੰਦੀ ਹੈ | ਹਾਲਾਂਕਿ ਪਹਿਲੇ 5 ਦਿਨ ਵੀ ਮੇਲੇ ਵਿਚ ਵੱਡੀ ਗਿਣਤੀ ਵਿਚ ਦਰਸ਼ਕਾਂ ਪੁੱਜੇ ਸਨ ਅਤੇ ਵੱਖ-ਵੱਖ ਸਟਾਲਾਂ 'ਤੇ ਜਾ ਕੇ ਆਪਣੀ ਦਿਲਚਸਪੀ ਵਿਖਾ ਰਹੇ ਹਨ, ਸੈਲਫੀਆਂ ਲੈ ਰਹੇ ਹਨ ਜਾਂ ਖ਼ਰੀਦਦਾਰੀ ਕਰ ਰਹੇ ਹਨ | 14 ਨਵੰਬਰ ਤੋਂ 27 ਨਵੰਬਰ ਤੱਕ ਚੱਲਣ ਵਾਲੇ ਇਸ ਵਪਾਰ ਮੇਲੇ ਦੀ ਥੀਮ 'ਇਕ ਭਾਰਤ, ਸਰੇਸ਼ਠ ਭਾਰਤ' ਹੈ | ਵਪਾਰ ਮੇਲੇ ਵਿਚ 31 ਰਾਜ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼, 55 ਸਰਕਾਰੀ ਮੰਤਰਾਲੇ ਅਤੇ ਵਿਭਾਗ ਅਤੇ 12 ਦੇਸ਼ਾਂ ਦੇ ਕਾਰੋਬਾਰੀ ਅਤੇ ਕੰਪਨੀਆਂ ਹਿੱਸਾ ਲੈ ਰਹੀਆਂ ਹਨ | ਵਪਾਰ ਮੇਲੇ ਦੇ ਅਧਿਕਾਰੀਆਂ ਦੇ ਮੁਤਾਬਿਕ, ਮੇਲਾ ਵੇਖਣ ਆਉਣ ਵਾਲੇ ਲੋਕਾਂ ਲਈ ਫ਼ੌਜ ਦਾ ਪਵੇਲੀਅਨ ਵਿਸ਼ੇਸ਼ ਖਿੱਚ ਦਾ ਕੇਂਦਰ ਬਣਿਆ ਹੋਇਆ ਹੈ | ਇਸ ਸਾਲ ਮੇਲਾ ਆਧੁਨਿਕ ਤਕਨਾਲੋਜੀ, ਵਾਤਾਵਰਨ ਸੁਰੱਖਿਆ, ਨਵੀਨਤਾ ਤੇ ਸਥਾਨਿਕ ਉਤਪਾਦਾਂ ਦੇ ਪ੍ਰਚਾਰ 'ਤੇ ਕੇਂਦਰਿਤ ਹੈ |