ਡੇਰਾਬੱਸੀ (ਮੋਹਾਲੀ), 22 ਸਤੰਬਰ- ਸ਼ਹਿਰ ਦੇ ਅਰਨੇਜਾ ਕਰਿਆਨਾ ਸਟੋਰ ’ਤੇ ਸਾਮਾਨ ਖਰੀਦਣ ਆਈ ਇਕ ਬਜ਼ੁਰਗ ਔਰਤ ਦੇ ਪਰਸ ਵਿਚੋਂ ਨਕਦੀ ਚੋਰੀ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਵਾਰਦਾਤ ਨੂੰ ਅੰਜ਼ਾਮ ਦੇਣ ਵਾਲੀਆਂ ਤਿੰਨ ਸ਼ੱਕੀ ਔਰਤਾਂ ਸਟੋਰ ਵਿਚ ਲੱਗੇ ਸੀ.ਸੀ.ਟੀ.ਵੀ. ਕੈਮਰਿਆਂ ਵਿਚ ਕੈਦ ਹੋ ਗਈਆਂ। ਘਟਨਾ ਦੀ ਵੀਡੀਓ ਵੀ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਰਹੀ ਹੈ।
ਜਾਣਕਾਰੀ ਅਨੁਸਾਰ ਬਜ਼ੁਰਗ ਔਰਤ ਕਰਿਆਨਾ ਸਟੋਰ ’ਤੇ ਸਾਮਾਨ ਖਰੀਦ ਰਹੀ ਸੀ। ਇਸੇ ਦੌਰਾਨ ਤਿੰਨ ਔਰਤਾਂ ਸਟੋਰ ਅੰਦਰ ਦਾਖ਼ਲ ਹੋਈਆਂ ਅਤੇ ਬਜ਼ੁਰਗ ਔਰਤ ਦੇ ਆਲੇ-ਦੁਆਲੇ ਖੜ੍ਹੀਆਂ ਹੋ ਗਈਆਂ। ਦੋਸ਼ ਹੈ ਕਿ ਮੌਕਾ ਵੇਖ ਕੇ ਉਨ੍ਹਾਂ ਵਿਚੋਂ ਇਕ ਔਰਤ ਨੇ ਬਜ਼ੁਰਗ ਦੇ ਵੱਡੇ ਪਰਸ ਵਿਚ ਰੱਖਿਆ ਛੋਟਾ ਪਰਸ ਕੱਢ ਲਿਆ। ਛੋਟੇ ਪਰਸ ਵਿਚੋਂ ਨਕਦੀ ਕੱਢਣ ਮਗਰੋਂ ਉਸ ਨੂੰ ਹੇਠਾਂ ਸੁੱਟ ਦਿੱਤਾ ਗਿਆ।
ਕੁਝ ਸਮੇਂ ਬਾਅਦ ਜਦੋਂ ਬਜ਼ੁਰਗ ਔਰਤ ਨੇ ਆਪਣਾ ਛੋਟਾ ਪਰਸ ਲੱਭਣਾ ਸ਼ੁਰੂ ਕੀਤਾ ਤਾਂ ਸ਼ੱਕੀ ਔਰਤਾਂ ਨੇ ਹੇਠਾਂ ਪਏ ਪਰਸ ਵੱਲ ਇਸ਼ਾਰਾ ਕਰਦਿਆਂ ਕਿਹਾ ਕਿ ਉਸ ਦਾ ਪਰਸ ਜ਼ਮੀਨ ’ਤੇ ਡਿੱਗਿਆ ਪਿਆ ਹੈ। ਬਜ਼ੁਰਗ ਔਰਤ ਨੂੰ ਪਰਸ ਤਾਂ ਵਾਪਸ ਮਿਲ ਗਿਆ, ਪਰ ਉਸ ਵਿੱਚ ਰੱਖੀ ਨਕਦੀ ਗਾਇਬ ਸੀ।
ਇਹ ਸਾਰੀ ਘਟਨਾ ਸਟੋਰ ਦੇ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਈ। ਫੁਟੇਜ ਸਾਹਮਣੇ ਆਉਣ ਤੋਂ ਬਾਅਦ ਵੀਡੀਓ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ। ਫਿਲਹਾਲ ਚੋਰੀ ਹੋਈ ਨਕਦੀ ਦੀ ਸਹੀ ਰਕਮ ਅਤੇ ਪੁਲਿਸ ਕੋਲ ਸ਼ਿਕਾਇਤ ਦਿੱਤੇ ਜਾਣ ਸਬੰਧੀ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ।
