ਮਹਾਤਮਾ ਗਾਂਧੀ ਦੇ ਪੱਤਰ ਤੇ ਹੱਥ-ਲਿਖਤਾਂ ਸਾਂਝੀ ਵਿਰਾਸਤ, ਇਨ੍ਹਾਂ ਦੀ ਨਿਲਾਮੀ ਨਹੀਂ ਕੀਤੀ ਜਾਣੀ ਚਾਹੀਦੀ

ਨਵੀਂ ਦਿੱਲੀ, 22 ਅਗਸਤ (ਪੀ.ਟੀ.ਆਈ.)-ਮਹਾਤਮਾ ਗਾਂਧੀ ਦੇ ਕਈ ਪੱਤਰ, ਹੱਥ-ਲਿਖਤਾਂ ਅਤੇ ਨਿੱਜੀ ਕਲਾਕ੍ਰਿਤੀਆਂ ਦੀ ਨਿਲਾਮੀ ਵਿਚ ਵਿਕਰੀ ਤੋਂ ਕੁਝ ਦਿਨ ਬਾਅਦ ਰਾਸ਼ਟਰੀ ਗਾਂਧੀ ਅਜਾਇਬ ਘਰ ਦੇ ਨਿਰਦੇਸ਼ਕ ਏ. ਅੰਨਾਮਲਾਈ ਨੇ ਕਿਹਾ ਕਿ ਅਜਿਹੀਆਂ ਵਸਤੂਆਂ ਸਿਰਫ਼ ਨਿੱਜੀ ਜਾਇਦਾਦ ਨਹੀਂ ਹਨ ਸਗੋਂ ਭਾਰਤ ਦੀ ਸਾਂਝੀ ਵਿਰਾਸਤ ਦਾ ਹਿੱਸਾ ਹਨ। ਉਨ੍ਹਾਂ ਨੇ ਉਨ੍ਹਾਂ ਲੋਕਾਂ ਨੂੰ ਵੀ ਅਪੀਲ ਕੀਤੀ ਕਿ ਜਿਨ੍ਹਾਂ ਕੋਲ ਅਜਿਹੀਆਂ ਵਸਤੂਆਂ ਹਨ, ਉਨ੍ਹਾਂ ਦੀ ਸੰਭਾਲ ਲਈ ਸੰਸਥਾ ਨੂੰ ਸੌਂਪਣ। 19 ਅਗਸਤ ਨੂੰ ਸੈਫਰਨਆਰਟ ਨਿਲਾਮੀ ’ਚ ਕੁੱਲ 86 ਵਸਤੂਆਂ ਨੀਲਾਮ ਕੀਤੀਆ ਗਈਆਂ, ਜਿਨ੍ਹਾਂ ਵਿਚ ਮਹਾਤਮਾ ਗਾਂਧੀ ਦੇ 688 ਹੱਥ-ਲਿਖਤ ਵਿਚਾਰਾਂ ਦਾ ਸੰਗ੍ਰਹਿ ਸ਼ਾਮਿਲ ਸੀ। ਉਨ੍ਹਾਂ ਦੇ ਨਜ਼ਦੀਕੀ ਸਾਥੀ ਅਤੇ ਆਜ਼ਾਦੀ ਘੁਲਾਟੀਏ ਆਨੰਦ ਟੀ. ਹਿੰਗੋਰਾਨੀ ਨੂੰ ਲਗਭਗ ਦੋ ਸਾਲਾਂ ਵਿੱਚ ਲਿਖੇ ਪੱਤਰਾਂ ਦਾ ਸੰਗ੍ਰਹਿ, ਜਿਸਦਾ ਸਿਰਲੇਖ “ਏ ਥੌਟ ਫਾਰ ਦ ਡੇ” ਹੈ, 16.20 ਕਰੋੜ ਰੁਪਏ ਵਿਚ ਵਿਕਿਆ, ਜੋ ਕਿ ਨਿਲਾਮੀ ਵਿੱਚ ਵਿਕਣ ਵਾਲੇ ਕਿਸੇ ਵੀ ਭਾਰਤੀ ਇਤਿਹਾਸਕ ਦਸਤਾਵੇਜ਼ ਲਈ ਇੱਕ ਵਿਸ਼ਵ ਰਿਕਾਰਡ ਹੈ।ਸਨਿਚਰਵਾਰ ਨੂੰ ਜਾਰੀ ਇੱਕ ਬਿਆਨ ’ਚ ਅੰਨਾਮਲਾਈ ਨੇ ਇਸ ਖ਼ਬਰ ਨੂੰ “ਬਹੁਤ ਹੀ ਦੁਖਦਾਈ ਅਤੇ ਦਰਦਨਾਕ” ਦੱਸਿਆ।