ਦੇਹਰਾਦੂਨ, 11 ਅਗਸਤ- ਬੀਤੀ ਦੇਰ ਰਾਤ ਉੱਤਰਾਖੰਡ ਦੇ ਉੱਤਰਕਾਸ਼ੀ ਅਤੇ ਟਿਹਰੀ ਗੜ੍ਹਵਾਲ ਵਿਚ ਭੁਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ। ਉੱਤਰਕਾਸ਼ੀ ਵਿਚ 4.2 ਤੀਬਰਤਾ ਦਾ ਤੇਜ਼ ਭੁਚਾਲ ਮਹਿਸੂਸ ਕੀਤਾ ਗਿਆ, ਜਦੋਂ ਕਿ ਟਿਹਰੀ ਵਿਚ 2.0 ਤੀਬਰਤਾ ਦਾ ਹਲਕਾ ਭੂਚਾਲ ਦਰਜ ਕੀਤਾ ਗਿਆ। ਦੋਵਾਂ ਥਾਵਾਂ 'ਤੇ ਕਿਸੇ ਜਾਨੀ ਜਾਂ ਮਾਲੀ ਨੁਕਸਾਨ ਦੀ ਕੋਈ ਰਿਪੋਰਟ ਨਹੀਂ ਹੈ।
ਉੱਤਰਕਾਸ਼ੀ ਵਿਚ ਯਮੁਨਾ ਘਾਟੀ ਅਤੇ ਗੰਗਾ ਘਾਟੀ ਸਮੇਤ ਕਈ ਖੇਤਰਾਂ ਵਿਚ ਭੁਚਾਲ ਮਹਿਸੂਸ ਕੀਤਾ ਗਿਆ। ਝਟਕਿਆਂ ਤੋਂ ਬਾਅਦ ਲੋਕ ਤੁਰੰਤ ਆਪਣੇ ਘਰਾਂ ਤੋਂ ਬਾਹਰ ਨਿਕਲ ਆਏ।
ਜ਼ਿਲ੍ਹਾ ਐਮਰਜੈਂਸੀ ਆਪ੍ਰੇਸ਼ਨ ਸੈਂਟਰ ਦੇ ਅਨੁਸਾਰ, ਭੂਚਾਲ ਸਵੇਰੇ 1:21 ਵਜੇ ਦੇ ਕਰੀਬ ਆਇਆ। ਰਾਸ਼ਟਰੀ ਭੁਚਾਲ ਵਿਗਿਆਨ ਕੇਂਦਰ ਨੇ ਇਸ ਦੀ ਤੀਬਰਤਾ 4.2 ਦੱਸੀ। ਭੁਚਾਲ ਦਾ ਕੇਂਦਰ ਉੱਤਰਕਾਸ਼ੀ ਜ਼ਿਲ੍ਹੇ ਵਿਚ ਸੀ, ਜਿਸ ਦੀ ਡੂੰਘਾਈ ਲਗਭਗ 10 ਕਿਲੋਮੀਟਰ ਸੀ। ਭੁਚਾਲ ਦਾ ਕੇਂਦਰ ਰਾਜਗੜ੍ਹੀ ਦੇ ਨੇੜੇ ਬਡਕੋਟ ਤਹਿਸੀਲ ਹੈੱਡਕੁਆਰਟਰ ਦੇ ਨੇੜੇ ਦੱਸਿਆ ਜਾ ਰਿਹਾ ਹੈ। ਭੁਚਾਲ ਟੀਹਰੀ ਗੜ੍ਹਵਾਲ ਦੇ ਕੀਰਤੀਨਗਰ ਅਤੇ ਘੰਸਾਲੀ ਖੇਤਰਾਂ ਵਿਚ ਵੀ ਮਹਿਸੂਸ ਕੀਤਾ ਗਿਆ। ਇਹ 2.0 ਦੀ ਤੀਬਰਤਾ ਨਾਲ ਆਇਆ।
