ਪਸ਼ੂਆਂ ਨੂੰ ਨਹਿਰ ਪਾਰ ਕਰਵਾਉਂਦੇ 2 ਨੌਜਵਾਨ ਡੁੱਬੇ

ਊਧਨਵਾਲ, 5 ਜੂਨ (ਪ੍ਰਗਟ ਸਿੰਘ)-ਜ਼ਿਲ੍ਹਾ ਗੁਰਦਾਸਪੁਰ ਦੇ ਕਸਬਾ ਊਧਨਵਾਲ ਨਜ਼ਦੀਕ ਪੈਂਦੇ ਪਿੰਡ ਮਨੇਸ ਪੁਲ 'ਤੇ ਬੈਠੇ ਗੁੱਜਰ ਭਾਈਚਾਰੇ ਦੇ 2 ਨੌਜਵਾਨ ਡੰਗਰਾਂ ਨੂੰ ਚਾਰ ਕੇ ਨਹਿਰ ਪਾਰ ਕਰਵਾਉਂਦੇ ਹੋਏ ਪਾਣੀ ਦੇ ਤੇਜ਼ ਵਹਾਅ ਵਿਚ ਡੁੱਬ ਗਏ। ਇਸ ਸਬੰਧੀ ਡੁੱਬੇ ਹੋਏ ਦੋਵਾਂ ਲੜਕਿਆਂ ਦੇ ਪਿਤਾ ਸ਼ੇਰ ਅਲੀ ਅਤੇ ਸਾਊਆ ਨੇ ਦੱਸਿਆ ਕਿ ਸਾਡੇ ਲੜਕੇ ਉਮਰ ਕਰੀਬ 17 ਸਾਲ ਆਪਣੇ ਪਸ਼ੂਆਂ ਨੂੰ ਚਰਾ ਕੇ ਵਾਪਿਸ ਨਹਿਰ ਦੇ ਰਸਤੇ ਘਰ ਆ ਰਹੇ ਸਨ। ਪਸ਼ੂਆਂ ਨੂੰ ਨਹਿਰ ਵਿਚੋਂ ਪਾਰ ਕਰਵਾਉਂਦੇ ਸਮੇਂ ਨਹਿਰ ਦਾ ਪਾਣੀ ਤੇਜ਼ ਹੋਣ ਕਾਰਨ ਕਾਕਾ ਪੁੱਤਰ ਸਾਊਆ ਨੂੰ ਬਚਾਉਂਦਿਆਂ ਸੰਮੂ ਪੁੱਤਰ ਸ਼ੇਰ ਅਲੀ ਵੀ ਡੁੱਬ ਗਿਆ। ਇਨ੍ਹਾਂ ਲੜਕਿਆਂ ਦੇ ਡੁੱਬਣ ਦੀ ਖ਼ਬਰ ਸੁਣ ਕੇ ਆਸ-ਪਾਸ ਦੇ ਲੋਕ ਅਤੇ ਗੁੱਜਰ ਭਾਈਚਾਰੇ ਦੇ ਲੋਕ ਵੱਡੀ ਗਿਣਤੀ ਵਿਚ ਅਤੇ ਪੁਲਿਸ ਪ੍ਰਸ਼ਾਸਨ ਵੀ ਮੌਕੇ 'ਤੇ ਪਹੁੰਚ ਗਿਆ ਤੇ ਖ਼ਬਰ ਲਿਖੇ ਜਾਣ ਤੱਕ ਭਾਲ ਜਾਰੀ ਸੀ।