23-04-26

 ਜੰਗਲਾਂ ਨੂੰ ਬਚਾਉਣਾ ਜ਼ਰੂਰੀ

ਮਨੁੱਖ ਆਪਣੀਆਂ ਜ਼ਰੂਰਤਾਂ ਲਈ ਕੁਦਰਤ ਨਾਲ ਖਿਲਵਾੜ ਕਰ ਰਿਹਾ ਹੈ। ਵਿਕਾਸ ਦੇ ਨਾਂਅ 'ਤੇ ਜੰਗਲਾਂ ਦੀ ਕਟਾਈ ਕੀਤੀ ਜਾ ਰਹੀ ਹੈ ਪਰ ਇਹ ਵਿਕਾਸ ਨਹੀਂ, ਦੁਨੀਆ ਦਾ ਵਿਨਾਸ਼ ਹੈ। ਜੰਗਲਾਂ ਦੀ ਕਟਾਈ ਕਾਰਨ ਬਹੁਤ ਸਾਰੇ ਜਾਨਵਰ ਬੇਘਰ ਹੋ ਰਹੇ ਹਨ। ਜ਼ਮੀਨ ਸਿਰਫ਼ ਮਨੁੱਖਾਂ ਦੀ ਹੀ ਨਹੀਂ, ਜਾਨਵਰਾਂ ਦਾ ਵੀ ਜ਼ਮੀਨ 'ਤੇ ਬਰਾਬਰ ਹੱਕ ਹੈ। ਜੰਗਲਾਂ ਦੀ ਕਟਾਈ ਸਿਰਫ਼ ਜਾਨਵਰਾਂ ਲਈ ਹੀ ਸਮੱਸਿਆ ਨਹੀਂ ਹੈ, ਬਲਕਿ ਇਹ ਮਨੁੱਖਾਂ ਲਈ ਵੀ ਗੰਭੀਰ ਸਮੱਸਿਆਵਾਂ ਪੈਦਾ ਕਰਦੀ ਹੈ ਜਿਵੇਂ ਜਲਵਾਯੂ ਵਿਚ ਤਬਦੀਲੀ, ਮਿੱਟੀ ਦੀ ਕਟੌਤੀ, ਪਾਣੀ ਦੇ ਚੱਕਰ ਦਾ ਵਿਗਾੜ ਆਦਿ। ਸਾਨੂੰ ਇਸ ਸਮੱਸਿਆ ਤੋਂ ਬਚਣ ਲਈ ਜੰਗਲਾਂ ਦੀ ਕਟਾਈ ਨਾ ਕਰਨ ਅਤੇ ਵੱਧ ਤੋਂ ਵੱਧ ਰੁੱਖ ਲਗਾਉਣ ਦੀ ਲੋੜ ਹੈ, ਤਾਂ ਹੀ ਤਾਂ ਕਿਹਾ ਗਿਆ ਹੈ ਕਿ 'ਧਰਤੀ ਮਾਂ ਕਰੇ ਪੁਕਾਰ, ਰੁੱਖ ਲਗਾ ਕੇ ਕਰੋ ਸ਼ਿੰਗਾਰ।'

-ਏਕਮਜੋਤ ਸਿੰਘ
ਦਿਆਲਪੁਰਾ।

ਟ੍ਰੈਫਿਕ ਨਿਯਮਾਂ ਦੀ ਪਾਲਣਾ

ਡਰਾਈਵਿੰਗ ਬਹੁਤ ਜ਼ਿੰਮੇਵਾਰੀ ਵਾਲਾ ਕੰਮ ਹੈ। ਲੋਕ ਡਰਾਈਵਿੰਗ ਕਰਦੇ ਸਮੇਂ ਬਹੁਤ ਗਲਤੀਆਂ ਕਰਦੇ ਹਨ ਜਿਵੇਂ ਮੋਬਾਈਲ ਦੀ ਵਰਤੋਂ ਕਰਨਾ, ਸ਼ਰਾਬ ਪੀ ਕੇ ਗੱਡੀ ਚਲਾਉਣਾ, ਟ੍ਰੈਫਿਕ ਨਿਯਮਾਂ ਦੀ ਪਾਲਣਾ ਨਾ ਕਰਨਾ ਅਤੇ ਓਵਰਸਪੀਡ ਡਰਾਈਵਿੰਗ ਕਰਨਾ ਆਦਿ ਜਿਸ ਨਾਲ ਸੜਕ ਹਾਦਸੇ ਹੋਣ ਦਾ ਡਰ ਬਣਿਆ ਰਹਿੰਦਾ ਹੈ। ਲੋਕ ਇਹ ਨਹੀਂ ਸੋਚਦੇ ਕਿ ਇਹ ਨਾ ਸਿਰਫ਼ ਉਨ੍ਹਾਂ ਲਈ ਖ਼ਤਰਨਾਕ ਹੈ ਬਲਕਿ ਦੂਜਿਆਂ ਦੀ ਕੀਮਤੀ ਜਾਨ ਲਈ ਵੀ ਖ਼ਤਰਨਾਕ ਹੈ। ਸਾਨੂੰ ਟ੍ਰੈਫਿਕ ਨਿਯਮਾਂ ਦੀ ਪਾਲਣਾ ਕਰਨੀ ਚਾਹੀਦੀ ਹੈ ਕਿਉਂਕਿ ਇਹ ਸਾਡੀ ਸੁਰੱਖਿਆ ਲਈ ਹੀ ਬਣੇ ਹੋਏ ਹਨ। ਸਰਕਾਰ ਨੂੰ ਇਨ੍ਹਾਂ ਸਮੱਸਿਆਵਾਂ 'ਤੇ ਧਿਆਨ ਕੇਂਦਰਿਤ ਕਰਨਾ ਚਾਹੀਦਾ ਹੈ। ਅਤੇ ਜੇਕਰ ਕੋਈ ਵਿਅਕਤੀ ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ ਕਰਦਾ ਹੈ ਤਾਂ ਉਸ ਨੂੰ ਬਣਦੀ ਸਜ਼ਾ ਮਿਲਣੀ ਚਾਹੀਦੀ ਹੈ।

-ਗਗਨਦੀਪ ਸਿੰਘ,
ਸਮਰਾਲਾ।

ਇਕ ਡੰਗ ਦੀ ਰੋਟੀ

ਬਾਪ ਦੀ ਸਾਰੀ ਉਮਰ ਦੌਰਾਨ ਮਿਹਨਤ-ਮੁਸ਼ੱਕਤ ਨਾਲ ਇਕੱਤਰ ਕੀਤੀ ਕਮਾਈ, ਧੀ ਦੀ ਬਰਾਤ ਦੀ ਇਕ ਡੰਗ ਦੀ ਰੋਟੀ ਮਸਾਂ ਪੂਰੀ ਕਰਦੀ ਹੈ, ਫਿਰ ਵੀ ਬਰਾਤ ਦੇ ਕੁਝ ਬੇ-ਸੁਹਿਰਦ ਲੋਕ ਖਾਣ-ਪੀਣ ਵਾਲੇ ਪਦਾਰਥਾਂ ਦਾ ਬੜੀ ਬੇਦਰਦੀ ਨਾਲ ਦੁਰਉਪਯੋਗ ਕਰਦੇ ਹੋਏ ਪੌਣੀ ਪਲੇਟ ਚੰਗੇ, ਸਵਾਦਿਸ਼ਟ ਦਾ ਕੀਮਤੀ ਭੋਜਨ ਪਦਾਰਥਾਂ ਨੂੰ ਹੱਥਾਂ ਨਾਲ ਪੂੰਝੇ ਨੈਪਕੀਨਾਂ ਨਾਲ ਢਕ ਕੇ ਡਸਟਬਿਨ ਵਿਚ ਸੁੱਟ ਕੇ ਕਿਸੇ ਆਮ ਪਾਣੀ ਦੀ ਵਰਤੋਂ ਕਰਨ ਦੀ ਬਜਾਏ, ਬੋਤਲਾਂ ਦੇ ਮਹਿੰਗੇ ਪਾਣੀ ਨੂੰ ਥੋੜ੍ਹਾ ਪੀ ਕੇ ਬਾਕੀ ਦੇ ਪਾਣੀ ਨਾਲ ਹੱਥ ਧੋਂਦੇ ਤੇ ਕੁਰਲੀਆਂ ਕਰਦੇ ਹਨ।
ਹਰ ਸ਼ਖ਼ਸ ਨੂੰ ਚਿੰਤਨ-ਮੰਥਨ ਕਰਨ ਦੀ ਲੋੜ ਹੈ ਜੋ ਇਹ ਸ਼ਾਦੀ ਹੀ ਨਹੀਂ, ਇਕ ਯੱਗ ਹੋ ਰਿਹਾ ਹੈ, ਸ਼ਾਦੀ ਕਰਨ ਵਾਲਾ ਵੀ ਆਪਣੇ ਹੀ ਵਰਗਾ ਇਕ ਭੱਠੇ ਦਾ, ਮਿੱਲ ਦਾ ਜਾਂ ਕਿਸਾਨ ਮਜ਼ਦੂਰ ਹੈ।
ਕਾਸ਼! ਸਾਨੂੰ ਕਿਸੇ ਦੀ ਥਾਂ ਆਪ ਖਲੋ ਕੇ, ਬੇ-ਹਿੱਸ ਵਾ ਬੇਦਰਦ ਮਾਨਸਿਕਤਾ ਦੇ ਧੁੰਦਲੇ-ਸ਼ੀਸ਼ੇ ਵਿਚੋਂ ਆਪਣਾ ਆਪਾ ਵੇਖਣਾ ਆ ਜਾਵੇ।

-ਲਖਵੰਤ ਸਿੰਘ ਵੜੈਚ

ਵਾਤਾਵਰਨ ਦੀ ਸੰਭਾਲ ਜ਼ਰੂਰੀ

ਵਾਤਾਵਰਨ ਦੀ ਸੰਭਾਲ ਅੱਜ ਦੇ ਯੁੱਗ ਦੀ ਸਭ ਤੋਂ ਮਹੱਤਵਪੂਰਨ ਲੋੜ ਬਣ ਚੁੱਕੀ ਹੈ। ਉਦਯੋਗੀਕਰਨ ਅਤੇ ਆਧੁਨਿਕ ਜੀਵਨ ਸ਼ੈਲੀ ਦੇ ਕਾਰਨ ਪ੍ਰਦੂਸ਼ਣ ਲਗਾਤਾਰ ਵੱਧ ਰਿਹਾ ਹੈ, ਜਿਸ ਨਾਲ ਹਵਾ, ਪਾਣੀ ਅਤੇ ਮਿੱਟੀ ਗੰਦੀ ਹੋ ਰਹੀ ਹੈ। ਇਹ ਪ੍ਰਦੂਸ਼ਣ ਮਨੁੱਖੀ ਸਿਹਤ ਅਤੇ ਪ੍ਰਕਿਰਤੀ ਦੋਵਾਂ ਲਈ ਖ਼ਤਰਨਾਕ ਹੈ।
ਸਾਨੂੰ ਚਾਹੀਦਾ ਹੈ ਕਿ ਅਸੀਂ ਵੱਧ ਤੋਂ ਵੱਧ ਰੁੱਖ ਲਗਾਈਏ, ਕਿਉਂਕਿ ਰੁੱਖ ਹਵਾ ਨੂੰ ਸਾਫ਼ ਕਰਨ ਵਿਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ। ਇਸ ਤੋਂ ਇਲਾਵਾ ਪਲਾਸਟਿਕ ਦੀ ਵਰਤੋਂ ਘਟਾਉਣੀ ਚਾਹੀਦੀ ਹੈ ਅਤੇ ਦੁਬਾਰਾ ਵਰਤੇ ਜਾ ਸਕਣ ਵਾਲੀਆਂ ਚੀਜ਼ਾਂ ਨੂੰ ਪ੍ਰੋਤਸਾਹਿਤ ਕਰਨਾ ਚਾਹੀਦਾ ਹੈ। ਪਾਣੀ ਦੀ ਬੱਚਤ ਅਤੇ ਸਾਫ਼-ਸੁਥਰਾ ਵਾਤਾਵਰਨ ਬਣਾਈ ਰੱਖਣਾ ਹਰ ਇਕ ਵਿਅਕਤੀ ਦੀ ਜ਼ਿੰਮੇਵਾਰੀ ਹੈ।
ਜੇ ਅਸੀਂ ਅੱਜ ਤੋਂ ਹੀ ਜਾਗਰੂਕ ਨਾ ਹੋਏ, ਤਾਂ ਭਵਿੱਖ ਵਿਚ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਗੰਭੀਰ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪਵੇਗਾ। ਇਸ ਲਈ ਸਾਨੂੰ ਮਿਲ ਕੇ ਵਾਤਾਵਰਨ ਦੀ ਰੱਖਿਆ ਲਈ ਕਦਮ ਚੁੱਕਣੇ ਚਾਹੀਦੇ ਹਨ।

- ਗੁਰਜੋਤ ਸਿੰਘ, ਰਾਜੇਵਾਲ